Осындай атаумен Астана төрінде өтіп жатқан Қазақстанның XI Азаматтық форумында қоғамды ұйыстырудағы мемлекеттің сенімді серіктесі – азаматтық сектордың рөлі айқындалды.

Алқалы жиынға үкіметтік емес ұйымдардың көшбасшылары, қоғамдық кеңес төрағалары, Парламент депутаттары, мемлекеттік органдардың, өңірлік және ұлттық даму институттарының өкілдері қатысып жатыр, деп хабарлайды Altaynews.kz тілшісі.

Іс-шараға қатысушылар азаматтық сектор өзекті елдік мәселелерді шешуде және демократиялық құндылықтарды нығайтуда үлкен рөл атқарады деген пікірде. Соңғы кездері ел билігі белсенді қоғамды қолдап келеді. Өйткені «қоғам-билік» форматындағы диалог пен коммуникация – халық үніне құлақ асатын мемлекет қағидаттарын іске асырудың негізгі тетігі. Мұны ел Президенті Қасым-Жомарт Тоқаев бірнеше мәрте қадап айтқан.

Еліміздің түкпір-түкпірінен жиналған делегаттардың айтуынша, өз өңіріңнің қоғамдық өміріне бейжай қарамау – патриоттықтың үлгісі.

Форум екі күнге созылады. Екі күнде панельдік сессиялар, пікірталастар, дөңгелек үстел басында жиындар, конференциялар өткізіледі. Қоғамдық кеңес институттарын дамыту тақырыбы, азаматтық қоғаммен өңірлік әріптестік құру әдістері талқыланады. Сондай-ақ үкіметтік емес ұйымдардың табысты әлеуметтік маңызы бар жобалары таныстырылады.

Ертең үкіметтік емес ұйымдар Әдеп және мінез-құлық кодексіне қосылу туралы меморандумға қол қояды. Сондай-ақ қайырымдылық саласындағы құрметті атақтар, республикалық «Тандау» сыйлығы, үкіметтік емес ұйымдарға арналған сыйлықтар салтанатты түрде табысталады. Екі күндік іс-шаралар легі осылай түйінделмек.