Бүгін Шығыс Қазақстан облыстық мәслихатының кезектен тыс VIII сессиясы өтті.

ШҚО мәслихатының депутаттары облыстың негізгі қаржылық құжатына өзгерістер енгізді, деп хабарлайды Altaynews.kz тілшісі.

Мәселен, ауыл шаруашылығы саласында жануарларға екпе салу құнының өсуіне байланысты эпизоотияға қарсы іс-шараларды жүргізуге қосымша 63,8 миллион теңге бөлу көзделген. Ал азық-түлік тауарларының өңірлік тұрақтандыру қорын толықтыруға 200 миллион теңге қарастырылған.

Сондай-ақ Өскемендегі әлеуметтік маңызы бар маршруттар және ауданаралық (қалааралық) автобус қатынастары бойынша жолаушылар тасымалдау қызметінің шығындарын қосымша субсидиялау көзделеді. Басқарма басшысының айтуынша, оған сәйкесінше 250 млн теңге және 217,4 млн теңге қарастырылған. Өзгерістер басқа да маңызды бағыттарға, соның ішінде әлеуметтік сала, білім беру, құрылыс және тұрғын үй-коммуналдық шаруашылық, мәдениет және спорт салаларына да әсер етті.

Автор: Aйжанат Бақытқызы