ШҚО мамандары Уфа қаласында (РФ,Башқұртстан Республикасы) ашылған Креативті индустриялар мектебінің тәжірибесін зерделеді.

Жуырда Уфа өнер училищесінде Креативті индустриялар мектебі ашылған. Ондағы мамандандырылған студияларда 12-17 жас аралығындағы жеткіншектер кескіндеме дизайн, электронды музыка, дыбыс режиссерлік, VR/AR интерактивті цифрлық технологиялар, анимация және 3D кескіндеме, фото-видео өнімдерін шығарумен айналысады, деп хабарлайды Altaynews.kz тілшісі.

Осы бағыттағы жұмыстармен ШҚО мамандары Уфада өтіп жатқан Халықаралық бизнес апталығы аясында танысты. Креативті индустриялар мектебі жұмысын таяуда бастағандықтан қазір балаларды қабылдау жүріп жатыр. Мұнда мәдениет пен өнер саласында қолданылатын заманауи цифрлық технологияларға қызығушылық танытқан балаларға қашанда есік ашық. 

ШҚО мәдениет басқармасы басшысының орынбасары Раушан Нұрмұханованың айтуынша, уфалықтардың бұл тәжірибесі қызығушылық тудырады және алдағы уақытта Шығыс Қазақстанның мәдени-білім беру саласына енгізу үшін зерделенуі мүмкін. 

Кітапханада МейкерСпейс (MakerSpace) технологиялық алаңының жұмыс істегеніне алтыншы жылға кетті. Оның жұмысы креативті индустрияларды дамытумен байланысты. Мұнда 3D-принтинг, цифрлық фотография, сублимациялық өнер бағытында тренингтер ұйымдастырылып, копирайтинг, СММ, мобилография бойынша семинарлар өткізіледі. Аталған шараларға негізінен жеткіншектер мен жастар қатысады

Цифрлық технологияларға негізделген креативті экономика бұл - қоғамның жаңаша дамуының өзегі. Бұл бағытта өзара тәжірибе алмасу Халықаралық бизнес апталығына қатысушылардың барлығына өте пайдалы болмақ.