Шығыс өңіріндегі көлік жолдарында 1634 су өткізгіш құбыры мен 90 көпір бар, деп хабарлайды Altainews.kz тілшісі.

Облыстық жолаушылар көлігі және автомобиль жолдары басқармасының басшысы Нұржан Жұмаділовтің айтуынша, тасқынның алдын алу үшін мына жолдардағы су өткізгіш құбырлар тазаланып жатыр: «Үлкен Нарын-Күршім», «Өскемен-Тарғын-Самар», «Васильевка-Бозанбай-Алғабас-Тарғын», «Октябрь өткелі-Алтайка-Ново-Хайрузовка», «Алтайка-Чапаево» «Күршім-Қалжыр-Бурабай-Маралды».

Құбырлардағы мұзды еріту үшін 30 тонна техникалық тұз сатып алынған көрінеді.

Ал «Қазсушар» ШҚ филиалының балансында 4 су қоймасы (Үйдене, Қандысу, Орта Теректі, Ұлан өзеніндегі Алебастр), су тасқыны қаупін тудырмайтын 7 су торабы және  43 магистральдық канал бар. Филиал директоры Нұржан Әміржановтың айтуынша, каналдардың бас құрылыстары жабылып, электр жабдықтары мен көтергіш механизмдерге тексеру жүргізілген. Су деңгейі де тұрақты бақылауда.