Су тасқынының алдын алу жұмыстары барлық аудандарда қарқынды жүріп жатыр. Су басу қаупі бар жерлердегі су арналары тазартылып, иннертті материалдар дайындалуда.

Күршім ауданы әкімдігі көктемгі су тасқынына толықтай дайын екендерін айтып отыр. Жалпы Күршім ауданы бойынша 8 өзен, 1 су қоймасы, 47 көпір және 604 су өткізетін арна бар. Ауданда 139 техника, 11 автобус және су басу жағдайы орын алған кезде тұрғындарды көшіруге арналған пункттер белгіленген. Сондай-ақ 100 тонна иннерттік материал да дайындалған, деп хабарлайды Altainews.kz тілшісі.

Сонымен қатар аудан көлемінде су тасқыны болған жағдайда 570 адам жұмылдырылмақ. Ал төтенше жағдайдың алдын алу мақсатында 13 дана мотопомпа, 5 дана су сорғыш автокөлік дайын тұр. Аудандық төтенше жағдайлардың алдын алу бағдарламасы бойынша бұл жұмыстарға 9,8 млн теңге қарастырылған екен.

Фото және видео: Күршім ауданының әкімдігі