Шемонаиха су тасқыны болу ықтималдығы жоғары аудандардың бірі. Өйткені өзен-көлі көп, қары мол жауатын өңірлер қатарында. Сол себепті аудан әкімшілігі су тасқынына дайындықты ерте жүргізіп, пысықтап жатыр.

Соңғы бес жылдың талдауына сәйкес ауданда топырақтың қатуының орташа тереңдігі 58,2 см құраған. Қар жамылғысы 30 см шамасында. Ондағы су басу қаупі бар елді мекендер қатарына Верх-Уба, Выдриха, Убинка ауылдары және Шемонаиха қаласы, Усть-Таловка кенті жатады, деп хабарлайды Altainews.kz тілшісі.

Аудан әкімінің тапсырмасына орай су тасқынына қарсы іс-шаралар жоспары әзірленіп, қорғаныс бөгеттерінің жай-күйі тексерілген. Сондай-ақ су өткізу каналдары мен арықтары тазартылып, өзен арналары тереңдетілген.

Төтенше жағдайлар басқармасы тұрғындарды да су басу қаупінің алдын алуға шақырады. Ауладағы қарды уақытылы шығарып, үй маңындағы арықтарды тазалап, жертөлелерден азық-түлікті шығаруға кеңес береді.

Қызырбек Дүргінбайұлы