Шығыс Қазақстанда тұңғыш рет ұйымдастырылып, 15 елдің гроссмейстерлері мен халықаралық шеберлерінің басын қосқан Oskemen Open-2024 халықаралық шахмат турнирі аяқталды, деп хабарлайды Altainews.kz тілшісі.

2 қазанда басталып, тоғыз күнге созылған шахмат бәсекесі швейцарлық жүйе бойынша өткенін айту керек. Жарыс 10 турдан тұрды, қатысушылар екі топқа бөлініп өнер көрсетті. Атап айтсақ, «Masters» турниріне рейтингісі 1 900-ден төмен емес 15 елдің 121 спортшысы қатысса, «Open» жарысында рейтингісі 2 100-ден аспайтын 74 ойыншы сынға түсті.

Тартысты өткен «Masters» турнирінің жеңімпазы әрі 5 миллион теңге көлеміндегі ақшалай сыйлықтың иегері болып 29 жастағы украиналық гроссмейстер Виталий Бернадский танылды. Екінші орын мен 3,5 миллион теңгенің жүлдесін Қытайдан келген гроссмейстер Бай Цзиньши жеңіп алды. Ал үшінші орын мен 2,5 миллион теңгеге Өзбекстан құрамасының сапында 2024 жылғы Олимпиаданың қола жүлдегері атанған Жахонгир Вахидов қол жеткізді.

Сондай-ақ, «Әйелдер арасындағы үздік нәтиже» және «Қазақстандық ойыншылар арасындағы үздік нәтиже" аталымдарында топ жарған үш ойыншы ақшалай сыйлықтарға ие болды. Атап айтсақ, осы аталымдарда бірінші орындарды иеленген ресейлік Яна Жапова (ФИДЕ) мен Қазақстан ерлер құрамасының ең жас мүшесі Алдияр Аңсат бір миллион теңгенің сыйлығына ие болды.
Бұл ретте «Masters» турнирінің жалпы жүлде қоры 24 миллион теңгені құрағанын, регламент бойынша үздік шыққан 15 ойыншы ақшалай сыйлықтарға ие болғанын айтқан жөн. 

Халықаралық турнирдің жабылу салтанаты Д.Серікбаев атындағы ШҚТУ ғимаратында өтті. Іс-шараға облысы әкімінің орынбасары Ербол Нұрғалиев, Қазақстан шахмат федерациясының бірінші вице-президенті Дәрмен Сәдуақасов, ШҚО бойынша KazChess филиалының төрағасы, кәсіпкер Анвар Рахимов сияқты мәртебелі меймандар қатысты.

Айта кетейік, Oskemen Open турнирі 2024 жылғы Қазақстан кубогы үшін жарыстың 2-ші кезеңі саналады. Осы ретте доланың шешуші кезеңі қараша айынның ортасында Алматыда өтетінін айтқан жөн.

Фото: Махаббат Ахметжанова