Риддерде бір айлық қар жауып қалды
Риддер қаласында түні бойы толассыз жауған қардың қалыңдығы бір метрден асты. Бұл көлік қозғалысына біраз кедергі келтірді, деп хабарлайды Altainews.kz тілшісі.
Риддерліктер үшін қарашадағы қалың қар үйреншікті жағдай. Дегенмен жұмысқа баратын халық үшін қарды омбылап жүру біраз қиындық тудырды.
- Бір тәуліктің ішінде бір айлық қардың нормасы түсті. Коммуналдық қызмет 24/7 жүмыс істеп жатыр. Түні бойы 13 техника тоқтаусыз қаланы қардан тазартумен болды. Күндіз де қала жолдарын тазалау жұмыстары тоқтатылмады. Жеке меншіктегі техника иелерін тарту арқылы бүгін 30 техника үздіксіз жұмыс істеді. Қазір техниканың жартысы екінші ауысымға шығып, көшелер түнде де қардан тазартылатын болады, - деді Риддер қаласының ішкі саясат, мәдениет, тілдерді дамыту және спорт бөлімінің басшысы Қанат Оралбек.
Қалың қармен қарбласып, қаладағы водоканал жүйесінде 4 апаттық жағдай орын алып, қаладағы бірнеше үй сусыз қалды.
- Қалада 340 шақырым ауыз су құбыры бар. Бір жерде болмасын, бір жерде құбырлардың жарылуы қалыпты жағдай. Қазіргі уақытта 4 апаттық жағдай да қалпына келтірілді. Қала тұрғындары ауыз сумен толық қамтылды, - деп қосты Қанат Оралбек.
Ақерке Рағызбаева
Фото: Риддер қаласының ішкі саясат, мәдениет, тілдерді дамыту және спорт бөлімінен
Оқи отырыңыз
