Құрметті шығысқазақстандықтар, ауылдастар!
Облыс аумағына  қалың қар түсіп, борандатуда. Соңғы күндері жауын-шашынның екі айлық нормасы жауды. Кейбір жерлерде қардың қалыңдығы бір метрден асты. Ауа райына байланысты республикалық маңызы бар 6 және облыстық маңызы бар 8 жол жабылды. Оларды қардан тазарту жұмыстары жүргізілуде. Барлық коммуналдық қызметтер  күшейтілген жұмыс режиміне көшті. Жалпы саны 400-ге жуық арнайы техника тартылды. Төтенше жағдай қызметінің жедел желісі іске қосылды. Волонтерлер жеке секторларда қар күреп, көмек көрсетуде. Осындай қиын уақытта күндіз-түні тынбай жұмыс істеп тұрған мекемелер мен қол ұшын беріп отырған жанашыр азаматтарға алғыс білдіремін! Облыста қар көшкіні қаупі бар 487 аймақ тіркелген. Олар - Қазселденқорғау орталығы мамандарының бақылауында. Қалалар мен аудандардың әкімдеріне төтенше жағдай кезінде шұғыл әрекет етуге тиісті тапсырмалар берілді. Бүгін түнде ауа температурасы минус 35 градусқа дейін төмендеп, қардың арты аязға ұласпақ. Мен, облыстың барлық тұрғындарын қауіпсіздік шараларын қатаң сақтауға шақырамын! Аса қажет болмаса алыс жолға шықпауды сұраймын! Облыстағы жағдай менің жеке бақылауымда.