2024 жылғы 25 қарашада әлеуметтік желілерде Өскемен қаласын түтін басқан бейнежазбалар тараған болатын. Осыған байланысты Шығыс Қазақстан облысының экология департаменті таңертеңнен бастап қаланың әртүрлі аудандарында ауа сапасын бақылау бойынша жедел шаралар ұйымдастырды, - деп хабарлайды Altainews.kz тілшісі ШҚО экология департаментіне сілтеме жасап.

Күні бойы арнайы жабдықтармен жүргізілген өлшеулер нәтижесінде зиянды заттардың шекті рұқсат етілген концентрациясы анықталған жоқ. «Қазгидромет» РМК ШҚО филиалының автоматты бақылау бекеттерінің деректері де 25 қарашада атмосфералық ауаның ластану көрсеткіштері ШРК-дан аспағанын көрсетті.

23 қарашадан бастап қалада қолайсыз метеорологиялық жағдайлар байқалуда.  Бұл жағдай синоптиктердің болжамы бойынша 26 қарашаға дейін жалғасады. Мұндай ауа райы атмосферада ластаушы заттардың таралуын қиындататыны белгілі.

Өскеменнің Алтай тауларында орналасуы әлсіз желді ауа райын тудырып, ластаушы заттардың жиналуына ықпал етеді. Сонымен қатар, жеке сектордағы көмірді қолданатын пештер, кәсіпорындардың қазандықтарынан шыққан түтін және автокөлік те ауаның сапасына кері әсерін тигізеді.

Экология департаменті экологиялық қауіпсіздікті қамтамасыз ету және халықтың өмір сапасын арттыруды басты міндеті ретінде қарастырады.