Ауыл мектептері арасында өткен II республикалық олимпиада қорытындыланып, жеңімпаздар мен жүлдегерлер белгілі болды. Биылғы жылы қорытынды кезеңге еліміздің шалғай аймақтарынан 486 оқушы қатысып, оның 221-і жеңімпаз атанды,- деп хабарлайды Altainews.kz тілшісі ҚР Оқу-ағарту министрлігіне сілтеме жасап.

Орта білім беру комитетінің төрағасы Қаныбек Жұмашұлы Бекболатов ауыл оқушыларының білімге деген ынтасы мен олимпиада мәртебесінің артып келе жатқанын ерекше атап өтті.

Олимпиада барысында 42 алтын, 62 күміс және 117 қола медаль табысталды. Жеңімпаздарға жетекші жоғары оқу орындары – SDU мен Қожа Ахмет Ясауи университетінен 8 ректорлық грант ұсынылды. Сондай-ақ, математика, физика және информатика бойынша үздіктер Республикалық физика-математика мектебіне грант негізінде қабылданды.

Үш кезеңнен тұратын олимпиадаға барлығы 99 264 оқушы қатысып, олардың 53 593-і аудандық кезеңге, ал 12 000-ы облыстық кезеңге жолдама алды. Финалдық кезең 10-14 желтоқсан аралығында Астанада өтеді.