Самар ауданындағы 22 елді мекен, яғни өңір халқының шамамен 94 пайызы үшінші не төртінші буын мобильді интернетімен қамтамасыз етілген. Бұл туралы аудандық әкімдіктен хабарлады.

Белгілі болғандай, бір жыл көлемінде Самар ауданында 3G мен 4G интернетіне қол жеткізген елді мекендер саны жеті пайызға артқан. Дегенмен, ғаламтор желісіне қосыла алмай отырған не интернеттің сапасы төмен ауылдар да жоқ емес. Олардың арасында Палатцы, Новостройка, Жаңажол, Қойтас, Қаракөл, Песчанка, Раздольное ауылдары бар. Бүгінде 700-ден астам адам тұратын бұл елді мекендердің халқынан интернеттің жоқтығына немесе төмен жылдамдығына қатысты шағым көп түседі. Мұны аудан әкімдігіндегілер де мойындап отыр.

Самар ауданы әкімінің орынбасары Қайдар Сұрашевтің айтуынша, бұл мәселе кезең-кезеңімен шешілетін болады.

Айта кетейік, бүгінде 5 700-ден астам адам тұратын аудан орталығы Самар ауылында елімізде тіркелген барлық ұялы байланыс операторының базалық станциялары орнатылған. Атап айтсақ, ауылда Актив пен Кселл де, Билайн да, Теле2 мен Алтел де қолжетімді. Самар ауылындағы екі мектепте «Starlink» кешені орнатылған. Ал Ы.Алтынсарин атындағы бастауыш мектепке «Қазақтелеком» компаниясының талшықтық-оптикалық байланыс желісі тартылған.

Дегенмен, аудан басшылығы ауыл тұрғындарынан ұялы байланыс пен интернет сапасына қатысты шағымдар түсетінін де жоққа шығармайды. Ауылда байланыс күшейткіштері, яғни  репитерлер бар. Қазір облыстық Цифрландыру және мұрағат басқармасы базалық станциялардың өткізу қабілетін арттыру жұмыстарын қолға алып, репитерлерді жою жөнінде тұрғындармен келіссөздер жүргізуде.

Ауданда шұғыл шешуді талап ететін тағы бір мәселе бар. Ол – Самар ауданындағы туристік аймақтардың интернетпен қамтылуы. Бұқтырма жағалауына алыс-жақынна келетін туристердің айтатыны ұялы байланыс пен интернеттің сапасы.

Аудан әкімдігінен хабарлағандай, бұл мәселе де назарда.

Нұржан Кенжеұлы