2025 жылдың 5 сәуірінен бастап мопедтер механикалық көлік құралдары ретінде танылып, оларға қатысты жаңа ережелер қолданысқа енгізіледі, деп хабарлайды Altainews.kz тілшісі.  

Жаңа талаптар қандай?  
Көрсетілген күннен бастап мопед иелері:  
- мопедті полицияда тіркеуден өткізуге;  
- А1, А немесе В санатындағы жүргізуші куәлігін алуға;  
- техникалық байқаудан өтуге;  
- азаматтық-құқықтық жауапкершілікті сақтандыруға міндетті болады.  

Мопедті тіркеу үшін тұрғындар:  
1. Өз тұрғылықты жеріндегі арнайы ХҚКО-ға жүгінуі керек.  
2. Жеке басын куәландыратын құжаттарды (электрондық нұсқада болуы мүмкін) және мопедтің техникалық сипаттамаларын ұсынуы қажет.  
3. Өтініш толтырып, мопедті тексерістен өткізіп, мемлекеттік баж салығын төлеуі тиіс:  
   - тіркеу үшін – 0,25 АЕК (983 теңге);  
   - тіркеу куәлігі үшін – 1,25 АЕК (4 915 теңге);  
   - мемлекеттік нөмір үшін – 1,4 АЕК (5 505 теңге).  

ШҚО Полиция департаменті ескертеді: егер 5 сәуірге дейін мопед тіркелмесе және жүргізуші куәлігі болмаса, мұндай көлік құралдарын пайдалану заңсыз деп танылады.  

Мопед жүргізушілеріне жүргізуші куәлігін алу үшін арнайы курстарға алдын ала жазылып, тиісті дайындықтан өту ұсынылады.