Шетелдік сарапшылардың талдауын дәйекке алған Шығыс Қазақстан облысының әкімі Нұрымбет Сақтағанов Риддер қаласының туристік әлеуеті өте жоғары екенін айтты. Оның сөзінше, Риддерден Катонқарағай мен Марқакөлге дейінгі аумақ туристік тұрғыда әлі толық ашылмаған, деп хабарлайды Altainews.kz.

Tengrinews.kz сайтына берген сұхбатында өңір басшысы туризм саласын экономиканың жаңа драйверіне айналдыру жоспарымен бөлісті.

Сұхбат барысында журналист туризм саласының баяу дамуына қатысты қаржы, кадр және инфрақұрылым тапшылығы мәселесін көтерді. Бұл сауалға жауап берген облыс әкімі Риддер қаласы бойынша швейцариялық компания арнайы талдау жүргізгенін айтты.

Әкімнің айтуынша, Риддерден Катонқарағай мен Марқакөлге дейінгі аумақ туристік тұрғыда әлі толық ашылмаған. Дегенмен алдағы екі жылда өңірдің келбеті түбегейлі өзгереді деп күтіліп отыр.

Оның айтуынша, бір кездері Кеңес Одағының шаңғы құрамасы дәл осы өңірде жаттыққан. Себебі мұндағы биіктік пен қар сапасы кәсіби спорт үшін аса қолайлы болған.

Аймақ басшысы Алтай қаласының дамуы агроөнеркәсіп саласымен тығыз байланысты болатынын да атап өтті.

Нұрымбет Сақтағановтың айтуынша, бұл салада табысты даму үшін ең алдымен қайта өңдеу бағытын күшейту қажет.

Шығыс Қазақстан облысындағы Алтай мен Риддер – тау-кен өндірісіне тәуелді моноқалалар. Осыған байланысты пайдалы қазбалар қоры таусылған жағдайда бұл қалалардың болашағы қандай болмақ деген сұрақ жиі көтерілетінін жеткізген журналист «Алтай мен Риддер Арқалықтың жолын қайталамай ма?» деген сауалын жолдады. Өңір басшысы Алтай мен Риддердің әлеуеті Арқалықпен салыстыруға келмейтінін айтты.

Оның сөзінше, бұрын кен өндіру барысында негізінен металдың құрамы жоғары үстіңгі қабаттар ғана игерілген. Ал төменгі қабаттарда да айтарлықтай қор бар.

Сонымен қатар облыста техникалық университет пен салалық ғалымдар бар екенін атап өткен Нұрымбет Сақтағанов өңірдің табиғи байлығы кемінде бірнеше онжылдыққа жететінін жеткізді.

Фото: Tengrinews.kz / Алимжан Аманжол