Өткен жұмада «AMANAT» партиясының базасында Үкіметтің Өңірлік саясат жөніндегі Жобалық кеңсесінің Аналитикалық орталығы ашылды. Бұл орталық «Әкімдер мектебі» жобасын жүзеге асырумен, басқару процестерін цифрландырумен және аудандық, ауылдық округ әкімдерінің экономикалық даму бағдарламаларын орындауын қолдаумен айналысады, - деп хабарлайды Altainews.kz тілшісі Kazinform.kz порталына сілтеме жасап.

Мемлекет басшысы Қасым-Жомарт Тоқаев Үкіметтің кеңейтілген отырысында тікелей әкім сайлауының жаңа мемлекеттік басқарушылар санатын қалыптастырғанын атап өтті. Олардың арасында мұғалімдер, дәрігерлер және мемлекеттік қызметте тәжірибесі жоқ өзге де мамандар бар. Президент «AMANAT» партиясының тәжірибесін ескере отырып, «Әкімдер мектебі» оқыту жобасын іске қосуды тапсырды.

"Аманат" партиясының басшысы Ерлан Қошановтың айтуынша, тікелей сайлау – демократияландырудағы маңызды қадам. Жаңа сайланған әкімдер қоғаммен тығыз жұмыс істеп, жергілікті мәселелерді шешуге белсене қатысады. «AMANAT» партиясы мен Үкіметтің ұйымдастыруымен әкімдерге заңнаманы, бюджет басқаруды үйрететін арнайы оқыту бағдарламасы жүргізіледі. Бұл олардың күнделікті жұмысында тиімді шешімдер қабылдауына көмектеседі.

Сондай-ақ партия ауыл әкімдерінің өкілеттігін кеңейту бойынша ұсыныстар әзірлеп, олардың бюджет көлемін ұлғайтуды қарастырды. Енді ауыл әкімдері көше саудасын реттеу, қоғамдық орындарды ұйымдастыру және жергілікті салықтардың түсуін бақылау секілді мәселелерді тікелей қадағалай алады.

Премьер-министрдің орынбасары Қанат Бозымбаевтың айтуынша, мемлекеттік органдар ауыл әкімдерінің дербестігін арттыру бойынша жүйелі шаралар қабылдайды. Олар бірыңғай ақпараттық жүйеге қосылып, халық саны, мал басы, жеке шаруашылықтардың жағдайы туралы толық статистикалық мәліметтерге қол жеткізеді. Сонымен қатар, қаржылық құралдардың жеткілікті болуы әкімдерге нақты нәтижелерге қол жеткізуге мүмкіндік береді.

«AMANAT» партиясы мен Үкіметтің бірлескен «Әкімдер мектебі» жобасы аясында 2400-ден астам аудан және ауыл әкімдері оқытылады. Бағдарлама экономикалық даму бағдарламаларын әзірлеу әдістерін үйретуге бағытталған. Әкімдер өз өңірінің экономикалық әлеуетін анықтап, өнім өндірісі мен оны өткізу тізбегін реттеуді меңгереді.

«Қарызсыз қоғам» жобасының атқарушы директоры Олжас Ордабаев қаржылық сауаттылықты арттыру бойынша жүргізілген жұмыстардың нәтижелерімен бөлісті. Екі жыл ішінде 840 мың адам оқудан өтіп, 70 мың адамға заңгерлік көмек көрсетілген. Енді жоба аясында онлайн оқыту жүйесі енгізіліп, құқықтық кеңес алу мүмкіндігі қарастырылады. Сонымен қатар, тұрғындардың ыңғайлылығы үшін арнайы call-орталық ашу жоспарлануда.

2025 жылдың мамырына дейін Өңірлік саясат жөніндегі Жобалық кеңсе мен «AMANAT» партиясы елдегі барлық ауылдық округтердің экономикалық даму бағдарламаларын әзірлеп, олардың жүзеге асырылуын қадағалайды. Сонымен қатар, орталық ауыл шаруашылығы өнімдерін сертификаттау, жеке қосалқы шаруашылықтардың өнімін ұйымдастырылған сатып алу және сауда желілері арқылы өткізу мәселелерімен айналысады.