Шығыс Қазақстанда ауыл әкімдерінің басын біріктірген облыстық форум өтті, деп хабарлайды Altainews.kz тілшісі.
Алқалы жиынға «Amanat» партиясының хатшысы Ержан Жылқыбаев, облыс әкімі Ермек Көшербаев, аудандар мен қала әкімдері, басқарма басшыларымен барлық деңгейдегі мәслихат төрағалары мен облысымыздағы 109 ауылдық окургтердің әкімдері қатысты.
Облыста алғаш рет ұйымдастырылып отырған ауыл әкімдері форумының пленарлық отырысында аймақ елді мекендерінің әлеуметтік-экономикалық дамуына серпіліс беретін мәселелер талқыланды. Сонымен қатар, «Amanat» партиясының алда тұрған негізгі мақсат-міндеттері талқыға түсіп, ондағы ауыл әкімдерінің атқарар жұмыстары сараланады.

Мемлекет басшысы Қасым-Жомарт Тоқаев өзінің 2020 жылғы 1 қыркүйектегі «Жаңа жағдайдағы Қазақстан: іс-қимыл кезеңі» атты Жолдауында ауыл әкімдерін тікелей сайлауды енгізу қажеттігі туралы мәлімдеген болатын. Осы орайда, өңірде 2021 жылдан бері 124 ауылдық округ пен 2 ауданда  әкімдердің сайлауы өтті. Халық таңдаған әкімдердің 114 -і «Amanat» партиясының мүшелері болып табылады. Олардың қатарында тікелей халық сайлауы арқылы тағайындалған Алтай және Глубокое аудандарының әкімдері де бар.
Ұйымдастырушылардың пікірінше, форум ауыл әкімдері арасында тәжірибе алмасуға, бірқатар мәселелерді нақтылауға, сондай-ақ, алдағы жоспарларды пысықтауға мүмкіндік береді. 
Аймақтық форумның жұмысына қатысқан облыс әкімі Ермек Көшербаев болса, мұндай іс-шараларды өткізудің басты мақсаты – халықтың өмір сүру сапасын жақсарту екенін атап өтті.