Катонқарағай ауданында биылдан бастап мемлекеттік және әлеуметтік мекемелер үшін жаңа жұмыс кестесі пилоттық режимде енгізілді. Жаңа тәртіп бойынша жұмыс уақыты 08:00-ден 17:30-ға дейін деп белгіленді. Бұл режимге ауданның 40 мекемесі көшіп отыр, деп хабарлайды Altainews.kz тілшісі.  
Катонқарағай ауданы әкімінің 2024 жылдың 30 желтоқсандағы №49 өкімімен 2025 жылдың 5 қаңтарынан бастап аудан әкімі аппаратының, ауылдық округтердің, дербес бөлімдердің қызметкерлеріне жұмыс уақыты 08.00-ден 17.30-ға дейін, түскі үзіліс 12.00-ден 13.30-ға дейін белгіленіп отыр. 

Естеріңізге салар болсақ, былтырғы желтоқсанда облыстың бірқатар басқарма басшылары топ болып, екікүндік іссапармен Катонқарағай ауданына барған болатын. Олар Өрел, Аршаты, Берел, Жамбыл, Қайыңды, Қызылжұлдыз, Аққайнар, Еңбек, Шыңғыстай, Жаңаүлгі, Қабырға, Белқарағай, Өрнек, Топқайың, Барлық, Коробиха, Ақсу ауылдарында болып, тұрғындарымен кездескен еді.
Сол кездесулерде жұмыс уақытын сағат 8:00-ден бастау туралы ұсыныс талқыланып, халықтың жұмыс кестесін өзгерту туралы пікірі тыңдалды. Жиналған қауым мұның тиімді жақтары туралы ой-пікірлерін ортаға салды. Қорытындысында барлық ауылдарда көпшілік жұмыс күнін таңғы 8.00-ден бастауды бірауыздан қолдап, дауыс берген. 
Жаңа жұмыс режимі енгізілгеннен кейін бір жарым ай өткен соң Altainews.kz тілшілері аудан тұрғындары арасында шағын сауалнама жүргізді. Нәтижесінде, көпшілігі жұмыс күнінің ерте басталуын оң бағалап, бұл өзгерісті қолдайтындықтарын білдірді.
Егер бұл тәжірибе өз тиімділігін дәлелдесе, алдағы уақытта өзге аудандарда да кезең-кезеңімен енгізілуі мүмкін.

Ержан Әбіш