Шығыс Қазақстан жаңа әуежайлар үшін авиация мамандарын даярлайтын болады, деп хабарлайды Altainews.kz тілшісі.
Келесі оқу жылында Саратовка ауылындағы Шығыс Қазақстан көпсалалы колледжінде авиация саласына қажетті мамандарды даярлау басталады. 2026 жылы түлектер Зайсан мен Катонқарағайда салынып жатқан әуежайларда жұмысқа орналасады. Бұл туралы ШҚО әкімі Нұрымбет Сақтағанов ҚР Көлік министрі Марат Қарабаевтың аймаққа жасаған жұмыс сапары барысында мәлімдеді.

Әкімнің айтуынша, өңірлік авиацияны дамыту үшін тек заманауи инфрақұрылым ғана емес, сонымен қатар жоғары білікті мамандар да қажет. Сондықтан облыс басшылығы оларды дайындау үшін қажетті жағдай жасауды өз міндетіне алып отыр.

Ішкі туризм мен логистиканы дамыту – Президент Қасым-Жомарт Тоқаев «Әділетті Қазақстан: заң және тәртіп, экономикалық өсу, қоғамдық оптимизм» атты Жолдауында атап өткен басым бағыттардың бірі. Осыған байланысты Мемлекет басшысы Зайсан және Катонқарағай аудандарында әуежайлар құрылысын бастауды тапсырған. Шығыс Қазақстанның туристер үшін тартымды өңірлерінде әуежайлар салу – аймақтың инвестициялық және экономикалық әлеуетін арттыруға жасалған маңызды қадам.

Дамир Омаров