Күршім ауданындағы 21 елді мекеннің 20-сы орталықтандырылған ауызсумен қамтылған. Енді аудан орталығы – Күршім ауылына су құбырын тарту жұмыстары жүргізіліп жатыр. Келесі жылы бұл ауылдағы барлық тұрғын үйлер таза су жүйесіне қосылып, аудан 100 пайыз ауызсумен қамтылатын болады, деп хабарлайды  Altainews.kz тілшісі.

Қазіргі таңда Күршім ауданында орталықтандырылған ауызсу желісі тартылмаған жалғыз елді мекен – Күршім ауылы.

Күршім аудандық сәулет, құрылыс, тұрғын үй-коммуналдық шаруашылығы, жолаушылар көлігі және автомобиль жолдары бөлімінің басшысы Жанболат Жамилханның айтуынша, бұл ауылдағы үш мыңнан астам тұрғын үй 2026 жылы толықтай таза ауызсумен қамтамасыз етіледі.

Ұзындығы 115 шақырым болатын су құбырларын «Integra Construction KZ» компаниясы салып жатыр. Ауылға жеткізілетін су бірнеше сүзгі және бактерицидтік қондырғылар арқылы тазартылып беріледі. Бұл – судың сапасына жүз пайыз кепілдік береді.

Фото/видео: Жәнібек Ырысбай