ШҚО әкімінің Зайсан ауданы тұрғындарымен кездесуі барысында мәдениет пен спорт саласындағы аудан дамуының басым бағыттары аталды, деп хабарлайды  Altainews.kz тілшісі.

Халықпен кездесуде өңір басшысы адам капиталының дамуы, әсіресе ауылдық жерлерде, мәдени және спорттық инфрақұрылымға жүйелі қолдау көрсетусіз мүмкін еместігін айтты.

Мәселен, 2025 жылы Сарытерек ауылындағы Мәдениет үйіне күрделі жөндеу жұмыстары аяқталады. Жаңартылған ғимаратта концерттер, фестивальдер және түрлі үйірмелер өткізіледі. Өңір әкімі осындай «нақты нысандар» арқылы ауылдық елді мекендерде сапалы мәдени орта қалыптасатынын атап өтті.

Кездесуде спорт инфрақұрылымын дамытуға да ерекше назар аударылды. Айнабұлақ ауылында қазіргі таңда шағын, бірақ функционалды спорттық модульдің құрылысы жүріп жатыр. Бұл нысан ауыл тұрғындарының дене шынықтырумен айналысуына мүмкіндік береді.

Кездесу барысында аудан тұрғындары мәдениет пен спорт саласына мамандар жетіспейтінін көтерді. Облыс әкімі бұл мәселенің назарда екенін, мамандарды даярлау мен жұмысқа тарту – әсіресе профильді жоғары оқу орындарының түлектерін ауылдарға тарту – жауапты мемлекеттік органдардың бақылауында екенін айтты.

Дамир Омаров