Шығыс Қазақстан облысының әкімі Нұрымбет Сақтағанов Қазақстанның Әзербайжандағы Төтенше және Өкілетті Елшісі Әлім Байел Дәуренұлымен кездесті. Жиында екіжақты ынтымақтастықты дамыту, экономикалық және мәдени байланыстарды кеңейту мәселелері талқыланды, деп хабарлайды Altainews.kz тілшісі.

Әлім Дәуренұлы Байел Қазақстан мен Әзербайжан арасындағы стратегиялық әріптестіктің жаңа деңгейге көтерілгенін атап өтті. Оның айтуынша, бұл байланыс мемлекет басшылары деңгейінде жоғары қолдау тапқан. Транскаспий дәлізі арқылы жүк тасымалы мен интернет байланысының дамуы, «Қазақтелеком» және «Әзертелеком» компанияларының әріптестігі киберқауіпсіздік пен цифрлық инфрақұрылым әлеуетін арттыруда. Сондай-ақ, Әзербайжан арқылы жасыл энергия, мұнай және уран экспорттау, Каспий теңізі арқылы тартылатын энергокабель арқылы Еуропаға энергия жеткізу жоспарлары жүзеге асырылып жатыр.

Қазақстан экономикасы Әзербайжанға бидай жеткізудің негізгі тасымалдаушысына айналды. Соңғы уақытта бидай экспорты 85%-ға дейін өсті.

Нұрымбет Сақтағанов Шығыс Қазақстанның жылына 900 мың тонна май өнімін қайта өңдеу әлеуеті бар екенін, сондай-ақ бал мен балық экспортын дамытуға дайын екенін айтты. Өңірдегі су қорының 40 пайызы есепке алынып, 92 шағын ГЭС салу жобасы ұсынылды.

Кездесуде май өнімдерін өндіруді арттыру, бал мен балық экспортын дамыту, шағын электр станцияларын салу сияқты жобалар талқыланды. Бұл бастамалар Шығыс Қазақстан мен Әзербайжан арасындағы байланыстарды одан әрі нығайтуға жол ашады.

Фото: Махаббат Ахметжанова

Видео: Руслан Акматалиев