Жаңа оқу жылының қарсаңы – балалар үшін ерекше толқынысқа толы кезең. Ал биыл Глубокое ауданының Белоусовка кентіндегі 80 оқушыға бұл қуаныш тіпті еселене түсті. Көпбалалы және аз қамтылған отбасылардың балаларына демеушілердің қолдауымен жаңа рюкзак пен оқу құралдары табыс етілді, деп хабарлайды Altainews.kz тілшісі.

Бұл жолғы «Мектепке жол» акциясы кездейсоқ жерде емес – "Келешек мектептері" жобасы аясында жаңадан бой көтерген заманауи мектептің жарық та кең залында өтті. Балақайлар ата-аналарымен бірге келіп, мерекелік концертті тамашалады, түрлі ойындарға қатысты. Жаңа сөмке, дәптер, қалам алған әрбір баланың жүзінде – қуаныш, ал ата-аналардың жанарында – ризашылық лебі сезілді.

Шараға қатысқан Глубокое ауданының әкімі Эльдар Тұмашинов, кәсіпкерлер мен демеушілер бүлдіршіндерді жаңа оқу жылымен құттықтап, оқуда озат, елге пайдалы азамат болып өсуге тілек білдірді.

Белоусовка кентінің тұрғыны, көпбалалы ана Алма Бюрекбаева бұл қайырымдылық акциясының жыл сайын өтіп тұратынын айта келе, биылғы шараның ерекше болғанын жеткізді.

Сегіз баланың анасы, «Алтын алқа» иегері Елена Федорованың бес бірдей баласы биыл мектепке барады. Әдеттегідей бұл отбасы да кент және аудан әкімдігі, ардагерлер ұйымы тарапынан қолдау алды.

Айта кетейік, еліміздің барлық өңірінде 1 тамыздан 30 қыркүйекке дейін «Мектепке жол» республикалық акциясы өтеді. Оған кез келген ниетті азамат, кәсіпкер немесе ұйым қатысып, балалардың жаңа оқу жылына дайындығына үлес қоса алады.

Фото: Александр Шушеньков