Металлургтердің кәсіби мерекесі елімізде жыл сайын шілденің үшінші жексенбісінде аталып өтеді. Мерекеге орай Өскемендегі Спорт сарайында отандық эстрада жұлдыздары қатысқан ауқымды концерт ұйымдастырылды. Іс-шара барысында «Казцинк» компаниясы өзінің еңбеккерлеріне ғана құрмет көрсетіп қоймай, батылдығымен көзге түскен жерлестерімізге «Ізгі жүрек» сыйлығын табыс етті.

Мұз айдынының кіреберіс залдарында қала тұрғындарына арналған ойын-сауық, интерактивті викториналар, мерекелік сауда-саттық, фотозоналар ұйымдастырылып, барша келушілерге балмұздақтар таратылды.

Жиында отандық металлургияның бастауында тұрған еңбек әулеттеріне де құрмет көрсетілді. Олар туралы роликтер көпшілік назарына ұсынылды. Отбасымен бірге салада еңбек етіп жүрген жерлестеріміз аз емес.

Салтанатты кеште дәстүр бойынша «Ізгі жүрек» марапаты табысталды. «Казцинк» кәсіпорны тағайындаған аталмыш сыйлық өз өмірі мен денсаулығын қатерге тіге отырып, өзге адамдарды құтқарып қалған ержүрек шығысқазақстандықтарды қолдауды көздейді. Бір ай бойы izgi-jurek.kz сайтында үміткерлерге дауыс беру жүргізілді. Үш жеңімпаздың әрқайсысы осы кеште арнайы мүсіншелер мен 1 миллион теңге мөлшеріндегі ақшалай сыйлыққа ие болды.

Сыйлық иегері Андрей Смольников өртеніп жатқан үйден екі бала мен олардың аналарын алып шыққан болатын. Екінші марапат иесі – әскери қызметкер Денис Шемет оқу-жаттығу кезінде кенеттен жарылған жауынгерлік гранатадан жас сарбазды өз денесімен жауып, қорғап қалған. Офицер өзі жарақат алса да, солдат дін аман үйіне оралған екен.

Сондай-ақ сыйлық Бұқтырма су қоймасында суға батып бара жатқан 13 жасар жеткіншекті құтқарған ТЖД қызметкері Еламан Нұқышевке берілді.

Атап өтерлігі, батыл жігіттерге сыйлықтарды Олимпиада чемпионы, атақты жеңіл атлет Ольга Рыпакованың өзі табыс етті.

Бұдан соң былтырғы қарашадан осы жылдың сәуіріне дейін жалғасқан «Казцинк дауысы» шығармашылық байқауының финалистері сахнаға шығып, өз өнерлерін паш етті. Олардың бәрі де осы компанияның қарапайым қызметкерлері екенін айта кеткен жөн.

Салтанатты кеш соңы әсерлі ән кешіне ұласты. Әйгілі әншілер Карина Абдуллина мен Садраддин өнер көрсетіп, көпшілікке қуаныш сыйлады.