Сенат депутаты Ольга Булавкина Шығыс Қазақстанға жүрдек пойыз бағытын ашуды ұсынды. Айтуынша, қазіргі пойызбен өңір тұрғындары жолға 27 сағатын жоғалтады. Екі қала ортасында жүрдек пойыз қатынайтын болса, тұрғындар діттеген жеріне 11 сағат ерте жетеді, деп хабарлайды Altaynews.kz тілшісі.

Депутат теміржол жолаушылар тасымалы саласындағы проблема бұрынғыдан да өзекті екенін айтты. Облыс пен Алматы қаласы арасында жоғары жылдамдықты теміржол қатынасы жоқ. Бүгінде облысты Алматы қаласымен байланыстыратын жалғыз жолаушылар пойызы – №351/352 «Алматы-2 – Өскемен-1» пойызы.

Булавкина осыдан екі жыл бұрын екі қала арасында «Тальго» жүрдек пойызы қатынағанын айтты. Айтуынша, сол кезде жол жүру уақыты 11 сағатқа бірақ қысқарған.

Сонымен қатар депутат халықаралық бағытты да жақсартуды ұсынды. Ол тұрғындардан Ресей Федерациясымен теміржол жолаушылар қатынасын, атап айтқанда Риддер – Томск бағытын ашуды сұрап отырғанын айтты. Сенатордың айтуынша, Алтай өлкесімен және Новосібір облысымен шектесетін және тығыз сауда-әлеуметтік байланысы бар Шығыс Қазақстан облысының теміржол қатынасын дамытса, облыста кәсіпкерлікті, оның ішінде туризмді дамытуға оң әсер етеді.

Депутат қысқы маусымда көлік құралы ретінде пойыздардың сенімдірек екенін, ауа райына байланысты жолдар жабылған кезде межелі жерге жетудің ең оңтайлы жолы екенін атап өтті.

Жанаргүл Мұқатай