ШҚО: Облыс шаруашылықтары 5 % жеңілдікпен жаңа техникалар сатып алып жатыр
Асыраушы сала - ауыл шаруашылығындағы техника паркін жаңарту үшін мемлекет тарапынан арнайы құрылған қаржылық институт -«ҚазАгроҚаржы» АҚ облысымыздың шаруашылық құрылымдарына қолдау көрсетіп жатыр, деп хабарлайды Altainews.kz сайты.
«ҚазАгроҚаржы» АҚ Шығыс Қазақстан облыстық филиалының директоры Мақсат Байгелдінің түсіндіргеніндей, «ҚазАгроҚаржы» АҚ «5% Жеңілдетілген лизинг» бағдарламасы бойынша шілде айынан бастап облыстың шаруашылықтарына, кәсіпкерлеріне ауыл шаруашылығы техникаларын 7 жылға лизингпен несиеге беріп жатыр. «5% Жеңілдетілген лизинг» бағдарламасы бойынша өтініштер қабылдау жалғасып жатыр. «5% Жеңілдетілген лизинг» бағдарламасы елімізде өндіріліп, құрастырылған комбайн, трактор, маялағыш, тұқым сепкіш сияқты түрлі отандық ауыл шаруашылығы техникаларын қаржыландыруға бағытталған.
Глубокое ауданындағы «Семена масличных» ЖШС «5% Жеңілдетілген лизинг» бағдарламасы бойынша 200 млн теңгеден астам қаржыға Қазақстанда шығарылған «ТRION -730» комбайнын сатып алып отыр. Аталған шаруашылық өздеріне қажетті техникаларды жиырма жылдан астам уақыттан бері «ҚазАгроҚаржы» АҚ арқылы лизингке, несиеге алып келеді. Шаруашылық жеңілдікпен беріліп жатқан несиеге осы уақытқа дейін 10 нан астам отандық ауыл шаруашылығы техникаларын сатып алған.
Егіншілікпен айналысып отырған Глубокое ауданындағы «Тамерлан и К» ЖШС өз елімізде өндірілген ауыл шаруашылығы техникаларын «ҚазАгроҚаржы» АҚ арқылы лизингке сатып алып, машина–комбайн паркін жыл сайын жаңарту үстінде. Шаруашылық жеңілдікпен берілген несие арқылы лизингке 700 млн теңгеден астам қаржының түрлі техникаларын сатып алған.
Прапорщикова ауылындағы Рустам Жамбосынов басқаратын «Тамерлан и К» қожалығының комбайншысы Дәулет Мұхаметқалиев өзі жүргізіп жүрген CLAAS TRION заманауи жаңа үлгідегі комбайны жұмыс істеуді жеңілдетіп, жұмыс өнімділігін, астық жинау сапасын арттырғанын айтады.
Жылдық 5%-бен ауыл шаруашылығы техникасын сатып алу үшін тұтынушылар KazAgroFinance.bot (https://t.me/kaz_agro_finance_bot) атты телеграм боты арқылы өтініш қалдыруларына немесе Өскемендегі «ҚазАгроҚаржы» АҚ-ның облыстық филиалымен байланысуға болады.
Бұдан кейін, 5 күн ішінде барлық қажетті құжаттарды жинап, «ҚазАгроҚаржы» АҚ-ның жергілікті филиалына тапсыру керек. Филиалдардың байланыс телефондары компанияның www.kaf.kz сайтында көрсетілген.
