Ауыл шаруашылығы тауарын өндірушілер үшін жаңа лизинг бағдарламасы іске қосылды.

Бағдарлама бойынша 370 млн теңгеге дейін техника алуға болады, деп хабарлайды Altainews.kz сайты ҚР Ауыл шаруашылығы министрлігі ақпаратына сүйеніп.

«ҚазАгроҚаржы» АҚ-ның жаңа қаржыландыру шарттары бастапқы жарнасыз ауыл шаруашылығы және арнайы техниканы, сондай-ақ ауыл шаруашылығы өнімдерін тасымалдауға арналған көліктерді сатып алуға мүмкіндік береді.

Лизинг шарттары:

• бастапқы жарна - 0% -дан;
• сыйақы мөлшерлемесі - 22,75% (субсидиялауды қоса есептегенде 6%);
• лизинг мерзімі - 10 жылға дейін;
• қаржыландыру лимиті - 370 млн теңгеге дейін.

Бағдарлама ережелері бойынша лизингке қазақстандық және шетелдік өндіріс техникасы беріледі. Бұдан бөлек, бағдарлама Қазақстанның азық-түлік қауіпсіздігін қамтамасыз етуге және агроөнеркәсіптік кешеннің тұрақты дамуын қолдауға бағытталған.

2024 жылы «ҚазАгроҚаржы» АҚ «Өз азығы», «Қазақстанда жасалған», «Жасыл өнім», «Жеңілдікті лизинг» бағыттары бойынша жеңілдікті қаржылық лизинг бағдарламаларын іске асыруға 6% сыйақы мөлшерлемесі бойынша 36,8 млрд теңге бөлуді жоспарлап отыр. Биыл ақпан айының басында «ҚазАгроҚаржы» жеңілдетілген бағдарламалар бойынша құны 14,8 млрд теңгеге 1310 ауыл шаруашылығы техникасын сатып алуға өтінімдер қабылдап үлгерген болатын. Оның ішінде бүгінгі күні 6,8 млрд теңгеге 544 бірлік техниканы сатып алуға қаржылық лизинг шарттары жасалды.