Өскеменде жоғалып кеткен екі жасөспірім табылды
25 желтоқсан күні 22:05-те "102" жедел арнасына 34 жастағы жергілікті тұрғын хабарласып, жоғалып кеткен екі баласын табуға көмек сұраған.
Ер адамның айтуынша, 15 жасар ұлы мен 13 жасар қызы 25 желтоқсан күні кешке үйден шығып кетіп, қайта оралмаған. Ұялы телефондары да үйде қалып қалған, деп хабарлайды Altaynews тілшісі.
Хабар ала салысымен жедел-іздестіру тобы дереу жиналып, таныстары мен куәгерлерден сұхбат алып, іргелес аумақтарды, аулаларды, тұрғын үйлердің кіреберістерін, гүлзарларды, саябақтар мен жастар жиналатын орындарды тексерген.
- Қабылданған шаралардың нәтижесінде 40 минуттан кейін кәмелетке толмаған екі баланы Боран-2 патрульдік экипажының қызметкерлері полиция аға лейтенанттары Салауат Шәкіров пен Қуаныш Акимеев Островский көшесінен тапты. Кәмелетке толмағандар әкесімен ренжіскеннен кейін үйден кеткендерін айтты. Қазіргі уақытта олардың өмірі мен денсаулығына ешқандай қауіп төніп тұрған жоқ. Үйге аман-есен жеткізілді,-деді Өскемен қ.ПБ бастығы Андрей Мула.
Табылған жасөспірімдердің әкесі құқық қорғау органдарына және оның кәмелетке толмаған балаларын іздеуге көрсеткен көмегі үшін барлық азаматтарға үлкен алғысын білдірді.
Оқи отырыңыз
