Щучинск қаласында шаңғымен тұғырдан секіруден бірден екі байрақты бәсеке FIS кубогы мен құрлықтық FIS кубогы үшін жарыстар өтті. Екі күнге созылған додаларға жерлесіміз Сергей Ткаченко да қатысып, жүлделі орыннан көрінді, деп хабарлайды Алтайньюс тілшісі.

Дәлірек айтсақ, шығысқазақстандық спортшы FIS кубогы үшін жарыстың HS 125 тұғырынан секіру сайысында үшінші нәтиже көрсетті. Бұл сынға отандастарымыздан бөлек, әлемнің Австрия, Германия, Жапония, Норвегия, Оңтүстік Корея, Украина, Швейцария сияқты 11 мемлекетінен келген 50-ге жуық спортшы қатысқанын айту керек.

Тағы бір атап өтер жайт, бұл лицензиялық жарыс болып саналады. Яғни, аталмыш бәсекеде үздік нәтиже көрсеткен шаңғышылар Әлем кубогы сарапқа салынатын додаға қатысу мүмкіндігіне ие болмақ.