Хабиб Нурмагомедов футболға ауыса ма? UFC чемпионы Instagram-да «біртүрлі» жазба қалдырды, деп хабарлайды Алтайньюс тілшісі.
Спортшы әлеуметтік желіге жүгіріп-жаттығып жүрген бейнежазбасын жариялап:
– Үлкен футболдағы алғашқы ойынға дайындалып жүрмін. Ұсыныстар болса, күтемін. Байқап көрейік, – деп жазды.
Футболшы болуы – дағыстандық жігітің бала арманы екені белгілі. Ол осы уақытқа дейін қоян-қолтық төбелестен гөрі, футболды нөмірі бірінші спорт түрі деп санайтынын жасырмай айтып келді. Достарымен бірге теңбіл доп теуіп жүргеніне желі қолданушылары да талай рет куә болған. 

 – Футбол жақсырақ. Онда біреуді ұрып-соғудың қажеті жоқ. Жасыл алаңға шығасың да, өзіңнің кәсіби шеберлігіңді паш етесің. Футбол маған ММА-ден де, UFC-ден де қатты ұнайды. Футболды қанша уақыттан бері көріп келемін, қанша көрсем де жалықпаймын. Ал UFC-ге келетін болсақ, бұрын жекпе-жектерді де бірін қалдырмай көретінмін, бірақ қазір мұнда құлдырау бар, –  деп сұхбат берген еді бірде Хабиб.

Хабиб Нурмагомедов октагонға ақырғы рет өткен жылдың қазан айында шықты.  Абу-Дабидегі турнирде Джастин Гэтжиді мерзімінен бұрын жеңіп, чемпион титулын үшінші рет сәтті қорғады. Осыдан кейін ол спорттық мансабының аяқталғанын жариялады.