Наурыздың 13-і күні облыстық маңызы бар Күршім-Ақсуат жолының 7-ші шақырымында және Күршім-Қалжыр жолының 19-шы шақырымында еріген қар суы жолды шайып кеткен болатын. 
Жағдайды жергілікті атқарушы билік пен төтенше жағдайлар қызметі бақылауына алып, тиісті жұмыстар дереу жүргізілген, деп хабарлайды Altainews.kz тілшісі. 
Нәтижесінде Күршім-Ақсуат жолына топан судың ағынын бұрып, бір арнаға бағыттау үшін жолға диаметрі 1 метр, ұзындығы 10 метр болатын су өткізгіш құбыр орнатылды.

Күршім-Қалжыр жолына да диаметрі 1 метр су өткізгіш құбыр орнатылған. Алайда ол еріген қар суына төтеп бере алмады. 

ШҚО жолаушылар көлігі және автомобиль жолдары басқармасының мәліметіне сүйенсек, облыстың коммуналдық қызметтері күшейтілген жұмыс режиміне көшірілген. Инертті материалдардың қажетті қоры дайындалған. Техникалар жеткілікті.