Саны өте аз, қорғауға алынып, Қазақстанның “Қызыл кітабына” енген Тянь-Шань қоңыр аюы «Тарбағатай» мемлекеттік ұлттық табиғи паркінде жүргені фототүзаққа ілінді, деп хабарлайды Altaynews тілшісі.

Бұл аю Тянь-Шань мен Памир, Гималай тауларында таралған. Қазақстанда Жоңғар Алатауында, Тоқсандай жотасында, Қояндытауда, Алтынемелде, Қайқанда және Тянь-Шань жотасында – Кетпен, Теріскей, Күнгей, Іле, Қырғыз және Талас Алатауларында, Өгем жотасында, Қоржынтауда кездеседі.

- Негізінен шөптесін өсімдіктермен, сирек жәндіктермен, майда сүтқоректілермен қоректенеді, кейде өлекселерді де жейді. Қонжықтары үшін қасқырлар мен барыстар өте қауіпті. Саны жылдан-жылға азаюда. Тарбағатай тауларында негізінен жабайы алмалар көп. Соның иісіне, алманың өзіне көп келеді, - деп хабарлайды «Тарбағатай» мемлекеттік ұлттық табиғи паркі.

Тянь-Шань қоңыр аюының аталығы (матай) аналығынан (кірекей) ірі болады. Аталығының дене ұзындығы 2,55 м, бойының биіктігі 1,35 м, салмағы 600 кг-дай.