Үш жыл аралығында «Рухани жаңғыру» бағдарламасы ұлттық деңгейдегі ауқымды жоба болып, барлық салада өз нәтижесін көрсетіп отыр. 3 жыл ішінде бағдарлама бағыттары айқындала түсті.

Биылғы жылы Республика болып атап өтіп жатқан ұлы Абайдың 175 жылдығы «Рухани жаңғырудың» маңызды бағдарына айналды. Елбасының «Болашаққа бағдар: рухани жаңғыру» атты мақаласында: «Абайдың даналығы, Әуезовтің ғұламалығы, Жамбылдың жырлары мен Құрманғазының күй­лері, ғасырлар қойнауынан жеткен бабалар үні – бұлар біздің рухани мәдениетіміз», - деп басты рухани құндылықтарымызды атап көрсетті. Халқымыздың руханиятын әлемге танытатын теңдесі жоқ құндылық екендігін баса айтты.

Қазақстан Республикасының Президенті Қасым-Жомарт Тоқаев бұл бағдарламаны жалғастырып, «Egemen Qazaqstan» газетінде жарық көрген «Абай және ХХІ ғасырдағы Қазақстан» мақаласында: «Жаңғыру – өткеннен қол үзіп, тек жаңа құндылықтарға жол ашу деген сөз емес. Шын мәнінде, бұл – ұлттық мұра­ларымызды бүгінгі оң үрдістермен үйлестіре дамытуды көздейтін құбы­лыс. Бұл ретте, біз Абайды айналып өте алмаймыз. Себебі ұлы ойшыл осыдан бір ғасырдан астам уақыт бұрын ұлтты жаңғыруға, жаңаруға, жаңа өмірге бейім болуға шақырған», -деп  ұлтымыздың рухани жаңғыруы тұсында ұлы Абайдың орны ерекше екенін атап көрсетті. Абай ілімі – ұлттың рухани-мәдени өмірінің басты темірқазығы. Ақынның даналық сөздері – халқымыздың рухани қазынасы. Бұл қазынаны ақтарған сайын, адам болудың, азамат болудың, адамгершілік пен ізгіліктің тура жолын табасың.

Абайдың шарқ ұрып іздегені, арман еткені рухани жағынан жан-жақты жетілген - Толық адам. Абайша «Толық адам» ыстық қайратты, нұрлы ақылды, жылы жүректі адам. Абайдың армандаған, аңсаған мұрат-мақсаттарының ең биік қол жетпес асқар шыңы. Дәл қазіргі уақытта рухы мықты ұрпақ тәрбиесі үшін Абай құдіреті қажет болып отыр.

Картаева Айжан Маратбекқызы

филология ғылымдарының докторы

С.Аманжолов атындағы ШҚМУ профессоры