Шығыс Қазақстан облысының әкімі Даниал Ахметов «Өскемен және Семей қалаларына карантин енгізілуі мүмкін» деген сыбысқа қатысты пікір білдірді, деп хабарлайды Алтайньюс тілшісі.  

Аймақ басшысының айтуынша, облыс көлемінде COVID-19 инфекциясы жоқ және жағдай тұрақты.

– Өкінішке орай, қиын-қыстау кезде елді дүрліктіретін жалған ақпараттар әлеуметтік желілер арқылы көп тарап жатыр. Мен облыс әкімі ретінде көптеген мәселеге, айталық төтенше жағдай кезіндегі әрбір іс-қимылға жауапты тұлғамын. Сондықтан Шығыстағы қалаларға карантин енгізу туралы мәселе қозғалмағанын айтқым келеді. Әкімдікте іс насырға шабар болса, қозғалысты шектуге байланысты жиналыс өткізгеніміз рас. Біз билік өкілдері ретінде мәселені жан-жақты қарастыруға міндеттіміз.

Өтінемін, дүрлікпеңіздер! Карантин енгізу немесе өзге де қатаң шаралар қабылданатын болса, мен өзім алдын ала мәлімдеймін. Дәл қазір ШҚО аумағында COVID-19 инфекциясы жоқ және жағдай тұрақты, – деді Даниал Кенжетайұлы.