Өскемен көшелеріндегі көктайғақтың кесірінен жол-көлік оқиғалары көбейді. Бүгін қоғамдық көліктердің бірі жол белгісіне, екіншісі жеңіл машинаға соғылды, деп хабарлайды Алтайньюс тілшісі.

Таңертең Тракторный көшесімен келе жатқан автобус тасжолдан тайып, «Казцинк» көлік тұрағындағы жол белгісіне барып соғылды. 1962 жылғы жүргізуші жол көктайғақ болғандықтан, рульге ие бола алмай қалғанын айтты.

Екінші жол-көлік оқиғасы 12.50 шамасында Күленов кентінде болды. Қоғамдық көлік  Энтузиастов көшесінде «Тойота» маркалы көлікпен соқтығысты.

– Жеңіл көліктің жүргізушісі тізгінге ие бола алмай №26 автобусқа барып соғылды. Жолаушылар түгел аман-есен. Зардап шеккендер жоқ, – деп мәлімдеді Полиция басқармасының баспасөз қызметі.

Әкімшілік құқықбұзушылық туралы кодекстің 610 бабы 1 бөлігі бойынша жол-көлік оқиғаларына кінәлілерге қатысты әкімшілік хаттама толтырылды.