Өскеменде «Аltay kids cup-2019» жарысы мәресіне жетті. Ольга Рыпакова атындағы жеңіл атлетика манежінде өткен доданың финалдық кезеңін жанкүйерлермен бірге облыс әкімі Даниал Ахметов те тамашалады.

Биыл екінші рет өткізіліп тұрған жарыс кезеңдеріне 20 мыңнан астам оқушы қатысыпты. Мұны спорттық шараға құрметті қонақ ретінде қатысқан даңқты жерлесіміз, үш қарғып секіруден Олимпиада чемпионы Ольга Рыпаковадан білдік.

– Бүгін сіздердің барлықтарыңыз да жеңімпазсыздар. Себебі, мыңдаған құрбыларыңыздың арасынан озып шығудың өзі үлкен жетістік. Командаларыңыздың намысын абыроймен қорғайтындарыңызға сенемін. Қашан да сәттілік жолдас болсын! – деді О.Рыпакова.

Олимпиада чемпионының мәлімдеуінше, мұндай жарыстар Еуропа елдерінде жыл сайын өткізілуде. Соның нәтижесінде сол елдердегі спорт секцияларына жазылған балалардың саны бірнеше есеге артқан.

Ал республикалық жеңіл атлетика федерациясының бас хатшысы Асхат Сейсембековтың айтуынша, биылғы дода үш кезеңнен тұрды. Оның алғашқысында жоғарыда айтқандай, облыстағы 670 мектептің 20 мыңнан астам оқушысы сынға түссе, екінші кезеңде қатысушылардың саны төрт мыңға дейін қысқарған.

Ал соңғы кезеңге 300-ден аса оқушы жолдама алған.
Жарыстың финалдық кезеңіне өткен сол жас спортшылар төрт түрлі сайыста, атап айтсақ, 60 метрге жүгіру, ұзындыққа секіру, доп лақтыру және 4х100 эстафетасында өзара мықтыны анықтады. Бір қызығы, биылғы бәсекеге қатысушы командалар белгілі бір аңдардың аттарын иеленіпті.

Мәселен, Абай ауданының балақайлары жарыс жолына «Абай ақ аюлары» деген атпен шықса, жармалықтар «Жарма қасқырлары» болып сынға түсті.

Айта кетейік, бір күнге созылған биылғы жарыстың жеңімпаздар былтырғыдай мақтау қағаздарымен, медальдармен және бағалы сыйлықтармен

марапатталды.
Жалпы, Шығыстағы өскелең ұрпақты жеңіл атлетикамен шұғылдануға шақыратын «Altay kids cup» сайысы облыс әкімі Даниал Ахметовтің тікелей тапсырмасы бойынша қолға алынған бастама екенін атап өткен орынды. Жарысты өткізуге «Altay Athletics» тұңғыш қазақстандық кәсіби жеңіл атлетика клубы да атсалысуда.