Шығысқазақстандық дзюдошы Ерлан Серікжанов Біріккен Араб Әмірлігінің Фуджайра қаласында өтіп жатқан Азия чемпионатының алтынына қол жеткізді.

Айта кетейік, бұл аталмыш додада Қазақстан құрамасының қоржыны салынған алғашқы алтын жүлде болды. Байрақты бәсекеде 66 келіге дейінгі салмақ дәрежесінде өнер көрсеткен үржарлық балуан финалға дейін іркілмей жетті. Ал шешуші белдесуде жерлесіміз тағы бір қазақстандық татами шебері Елдос Жұмақановпен кездесуі керек болатын. Алайда алматылық дзюдошы бұрынырақта алған жарақатына байланысты татамиге шыға алмай қалды. Осылайша, Серікжанов жеңімпаз деп танылып, құрлықтық доданың алтын жүлдесіне ие болды.

Бұл Ерлан Серікжановтың халықаралық аренадағы алғашқы жүлдесі емес. Естеріңізге салайық, шығысқазақстандық дзюдошы былтыр Әзірбайжан астанасы Бакуде өткен Әлем чемпионатының күміс жүлдегері атанған-ды. Ол, сонымен қатар Марокко, Тунис және БАӘ-де өткен халықаралық бәсекелерде жүлдегерлер қатарынан көрінген.