Шығыс Қазақстан облысында мәслихаттың кезектен тыс XXII сессиясы өтті.

Жиында облыстық мәслихат депутаттарын сайлау жөніндегі аймақтық сайлау комиссияларының мүшелері бекітілді, деп хабарлайды Altaynews тілшісі.

Аймақ басшысы Даниал Ахметов қатысқан сессияда облыс әкімдігінің дербес құрамын келісу және аймақтық сайлау комиссияларының мүшелерін бекіту туралы мәселе талқыланды.

«Облыстық мәслихат сайлауының аралас сайлау жүйесіне көшуіне байланысты Шығыс Қазақстан облыстық аймақтық сайлау комиссиясы 2022 жылғы 28 желтоқсанда өз қаулысымен 16 бірмандатты аумақтық округ құрды», - деді Шығыс Қазақстан облыстық мәслихатының төрағасы Денис Рыпаков.

Сессияда 5 мүшеден тұратын 13 аймақтық сайлау комиссиясының құрамы бекітілді. Жалпы 65 адам сайланды.

Сондай-ақ ҚР ОСК-ның 2022 жылғы 27 желтоқсандағы қаулысымен ШҚО сайлау комиссиясының мүшесі Владимир Пак міндеттерінен босатылған еді. Оның орнына Шайзада Молдажарова ұсынылды және оның кандидатурасын облыс депутаттары қолдады.