Өңірлік ерекшеліктеріне қарамастан, Қазақстанның барлық қала-аудандарында мемлекеттік сатып алу саласындағы бизнес субъектілерінің құқықтары жүйелі түрде бұзылатыны жасырын емес.

Мәселен, Алматы қаласының кәсіпкері Шығыс Қазақстан облысының кәсіпкерлер палатасының араласуының арқасында тапсырыс берушіден өзіне тиесілі қаражатын қайтарып алды, деп хабарлайды Altaynews  тілшісі.

Нақтырақ айтсақ, 2022 жылдың қазан айында ШҚО кәсіпкерлер палатасына "DXTSTILL" ЖК директоры Данил Кашура мемлекеттік сатып алу шарты бойынша тапсырыс берушімен арада орын алған төлем мәселесін шешуге жәрдемдесуді сұраған.

Анық болғандай, "Таза Өскемен" МКК алдында қабылданған міндеттемелерге сәйкес кәсіпкер 7 күн ішінде жалпы сомасы 5,5 млн теңгенің акрил эмалін жеткізді. Алайда тапсырыс беруші төлем мерзімін кешіктіргенімен қоймай, кәсіпкер палатаға шағым түсіргенге дейін жеткізілген тауар үшін есеп айырыспаған.

"DXTSTILL" ЖК құқығын қорғау мақсатында облыстағы Кәсіпкерлер палатасы "Таза Өскемен" МКК-не тиісті сауалдар жолдады.

ШҚО кәсіпкерлер палатасының және "Бизнеске жол" жобасы шеңберінде әрекет ететін ШҚО сыбайлас жемқорлыққа қарсы қызметінің дәйекті әрекеттерінің нәтижесінде жеткізілген тауар үшін төлем толық көлемде жүргізілді. Егер "Атамекен" мен "Антикор" іске араласпаған жағдайда кәсіпкер өз ақшасын алар ма еді, әлде әлі де күтіп жүрер ме еді, кім білсін?!.