Өскемендік құтқарушылар өрт оқиғалары кезінде ауладағы шлагбаумдар кедергі келтіретінін айтып шағымданды.

Тұрғындар өз бетінше орнатқан шлагбаумдар мен плиталар оқиға болған жерге дер кезінде жетуге мүмкіндік бермейді, деп хабарлайды Altaynews тілшісі.

ТЖД мамандары жедел жәрдем қызметкерлері және тәртіп сақшыларымен бірлесіп қала аулаларына рейд жүргізген болатын. Нәтижесінде, құтқарушылар қызметіне кедергі келтіретін шлагбаумдардан бөлек, көлігін дұрыс қоймайтын тұрғындар да анықталды. Жүргізушілердің назарын аудару үшін өрт сөндірушілер сиренаны қосуға мәжбүр болды. Бірақ көлік иелері оған да аса назар аудармаған көрінеді.

Рейд барысында көліктерін тұраққа дұрыс қоймаған жүргізушілер жауапкершілікке тартылды. Енді олар 35 мың теңге көлемінде айыппұл төлейтін болады.