ШҚО-да 9400-ден астам бүлдіршін мектеп табалдырығын аттайды
Биыл ШҚО-да 9400-ден астам бүлдіршін мектеп табалдырығын аттайды.
Республика бойынша бірінші сыныпқа өтініштерді қабылдау 1 сәуірде басталған болатын, деп хабарлайды Altaynews тілшісі.
Бұл туралы Өңірлік коммуникация қызметі алаңында өткен баспасөз брифингінде ШҚО білім басқармасы басшысының орынбасары Динара Шаухина айтты.
– Биыл облыс бойынша 9404 бала бірінші сыныпқа қабылданады. 15 мамырдағы жағдай бойынша оның 63,8 пайызы, яғни 6004 бүлдіршін өтініш беріп үлгерген, – дейді Динара Шаухина.
Бірінші сыныпқа өтініштерді қабылдау 1 тамызға дейін жалғасады. Ведомствоның мәлімдеуінше, бұл – білім беру процесіне қатысушыларға ыңғайлы болу үшін қабылданған шешім.
Өтініш беру үшін білім ордасына барудың қажеті жоқ, қазір құжаттарды Egov электронды үкімет порталында тапсыруға да болады.
Сондай-ақ биыл облыс мектептері үшін жаңа оқулықтар сатып алуға 450 миллион теңге қарастырылған.
Оқи отырыңыз
