Облыс орталығындағы ауаның ластану деңгейін және шығындыларды азайту үшін экологтар жылу энергиясына арнайы түнгі тариф енгізуді ұсынып отыр.

Бұл туралы Өңірлік коммуникациялар қызметі алаңында өткен баспасөз брифингінде ШҚО экология департаментінің басшысы Данияр Әлиев айтты, деп хабарлайды Altaynews тілшісі.

Өскеменде ауаны негізгі ластайтын өнеркәсіптік кәсіпорындар екені баршамызға аян. Десе де, экологтар қазіргі уақытта оған жыл сайын артып келе жатқан қоғамдық көліктер мен жеке тұрғын үй секторлары және жеке қазандықтар да қосылғанын атап өтті.

Аталған экологиялық проблемаларды шешу үшін де экологтар жылу энергиясына түнгі тариф енгізуді ұсынып отыр. Алайда оның қалай әрекет ететіні және қала билігі мен энергия таратушы компаниялар бұл ұсынысқа қалай қарайтыны әзірге белгісіз.