Д.Серікбаев атындағы Шығыс Қазақстан техникалық университетінің ғалымдары Дүниежүзілік банк пен Цифрлық даму, инновациялар және аэроғарыш өнеркәсібі министрлігінің «Консорциум I. Құзіреттілік орталықтары» грантын жеңіп алды. 
Техникалық университеттің баспасөз қызметі хабарлағандай, жоба «Майлы дақылдардың тәжірибелік шаруашылығы» ЖШС мен «Қостанай агромеханикалық зауыты» ЖШС-ның бірлескен серіктестігі аясында іске асырылады, деп хабарлайды Altaynews.kz тілшісі.            
 «Smart engineering» құзыреттілік орталығының басшысы, PhD докторы Бағдат Азаматовтың айтуынша, ауыл шаруашылығы дақылдарын тыңайтуға арналған қондырғы сұйық тыңайтқыштарды дақылдардың тамыр жүйесіне тікелей енгізуге мүмкіндік береді. 
Кешендегі 48 дөңгелектің әрқайсында 12 инъектор бар. Дөңгелектер айналғанда инъекторлар топыраққа 7-8 сантиметр тереңдей еніп, сұйық тыңайтқышты бүркіп шашады.
Фермерлер тарапынан мұндай қондырғыларға сұраныс жоғары, өйткені осы әдістің нәтижесінде өнімділік 30%-ға ұлғаяды.