«Шығыс» өңірлік қолбасшылығына қарайтын әскери бөлімдер арасында қоян-қолтық ұрыстан жарыс өтті. Жарысқа Павлодар, Семей және Өскеменнің алпысқа жуық  жауынгері қатысты, деп хабарлайды Altainews.kz тілшісі

Әскери қызметкерлер күш сынасып ғана қоймай өзара тәжірибе алмасып, біліктіліктерін жетілдірді.

Сайысқа қатысушылардың бірі – Манарбек Әсембай. Ол өткен жылы 67 келі салмақ дәрежесінде сынға түсіп, жеңімпаз атанған. Биыл былтырғы атағын қорғауға ниетті.

Жарыс қорытындысы бойынша жеті салмақ дәрежесі бойынша топ жарғандар арнайы медальмен және дипломмен марапатталды. 1 орынды Семей қаласынан келген 5511 әскери бөлім жауынгерлері иеленді. 2 орынға Өскемендегі 5518 бөлімі, 3 орынға Павлодардың 5512 әскери бөлімі ие болды.

Енді үздік спортшылардан «Шығыс» өңірлік қолбасшылығының құрамасы жасақталып, сәуір айында Алматы қаласында өтетін Қазақстан чемпионатына жіберіледі.