«Park City» тұрғын үй кешенінде бой көтерген білім ордасы қыркүйектен бастап оқушыларға есігін айқара ашады. Мұндағы мердігер құрылыс жұмыстарын аяқтап, мектептің ішін тазалауға кіріскен. 
Облыс орталығындағы халық саны жылдан жылға артып келеді. Әсіресе, жаңадан салынған аудандар мен тұрғын үйлерге қоныстанғандардың қарасы басым. Мәселен, Базовая көшесінің бойындағы «Park Сity» тұрғын үй кешенінің өзінде бес мыңнан астам тұрғын бар. Сол отбасыларда 800-ден астам мектеп оқушылары қаланың өзге мектептерінде білім алуда. Осыған байланысты аталмыш ауданнан 600 орындық жаңа мектептің құрылысы басталған болатын, деп хабарлайды Altainews.kz тілшісі.  
Қарқынды құрылыстың нәтижесінде білім ордасының қолданысқа берілетін күні де алыс емес.   

Жаңа мектеп заман талабына сай болмақ. Жалпыға міндетті білім беру стандарттарына сай барлық пәндік сыныптар мен лаборатория толыққанды жаңа технологиямен жабдықталады. 

Өскеменде «Жайлы мектеп» бағдарламасынмен тағы да үш мектеп салынып жатыр екен. Білім ордасының екеуі Есенберлин, Увалиев көшелерінде, ал енді бірі Бабкина мельница шағын ауданында бой көтермек. Олардың құрылыс жұмыстарын жыл соңына дейін аяқтау жоспарланған.