Облыстық полиция департаментінің басшысы жұмыс сапарымен Жарма ауданының полиция бөліміне барды, деп хабарлайды Алтайньюс тілшісі.

Жеке құрам өкілдерімен жедел кеңес өткізкен облыстық ведомство басшысы Сағат Мәдиев ішкі істер органдарындағы қызметтік тәртіпті, моральдық-психологиялық ахуалды және заңдылықты нығайту мәселелерін талқылады.

– Полиция қызметінің басты бағасы – халықтың сенімі. Бұл туралы мемлекет басшысы өз жолдауында айтты. Ішкі істер министрі атап өтті. Азаматтардың өтініші мен шағымына құлақ түру, олардың құқықтары мен бостандықтарын қылмыстық қол сұғушылықтан қорғау – біздің негізгі міндетіміз болып қала береді, – деді полиция полковнигі Сағат Мәдиев.

Департамент басшысы ішкі істер органдарының жұмысын сервистік модельге көшіріп, соған сәйкес «қолжетімді полиция» қағидаты бойынша жұмыс істеу керектігін атап өтті. Сондай-ақ полицияның учаскелік пункттерін бейнекамерамен жабдықтауды жалғастыруды тапсырды.