Семей қаласының тұрғыны жетінші қабаттан құлап кетті, деп хабарлайды Алтайньюс тілшісі.

Ер азамат бірінші қабатта орналасқан сауда үйінің маңдайшасына құлап түскен.

– Құтқарушыларға 16:41-де хабарлама келді. Арада алты минут өткенде мамандандырылған өрт сөндіру бөлімінің қызметкерлері оқиға орнына жетті. Құтқарушылар екінші қабаттың тұсындағы маңдайшаға көтеріліп, полиция қызметкерлерімен бірге зардап шегушіні қатты зембілге салып, арқан байлап, ақырын төмен түсіріп, жедел медициналық жәрдем дәрігерлеріне табыстады, – деп мәлімдеді ШҚО ТЖД баспасөз қызметі.

Ер азамат қалалық аурухананың жансақтау бөліміне жатқызылды. Куәгерлердің айтуынша, қонаққа келген азамат мас болған. Сол себепті терезеден абайсызда құлап кеткен көрінеді.