Шығыс Қазақстан облысының Үржар ауданындағы көпбалалы және аз қамтылған отбасылардың үйлеріне биылғы жылыту маусымы қарсаңында 130 улы газ датчигі орнатылды.

Облыстық төтенше жағдайлар департаментінен хабарлағандай, ауданға мұндай дабылқаққыштардың барлығы 200 данасы жеткізілген. Салыстырмалы түрде алып қарасақ, былтыр аталмыш санаттағы отбасылардың үйлеріне 30 дачтик орнатылыпты.

Аудандық төтенше жағдайлар бөлімінің талдауына сәйкес, жылыту маусымы басталысымен тұрғын үй секторындағы өрттердің саны еселеп артады. Мұның себебі – пешті пайдалану кезінде қарапайым өрт қауіпсіздігі ережелерінің сақталмауы. Мәселен, 2018 жылы ауданда дәл осындай салғырттық салдарынан 68 өрт фактісі тіркеліп, шығын мөлшері 97,5 миллион теңгені құраған. Былтырғы көрсетіш те мәз емес – 58 өрт пен 153 миллион теңгенің шығыны.

Айта кетейік, бүгінге дейін жергілікті ТЖБ мамандары аудандағы 12 мыңнан астам тұрғын үйді тексеріп, халықпен түсіндіру жұмыстарын жүргізіп қайтқан.