Алдағы оқу жылында Зайсан ауданындағы көпбалалы отбасылардың 1 974 баласы тегін мектеп формасымен қамтылмақ. Бұл туралы бір топ көпбалалы анаға жаңа баспана кілтін табыс ету рәсімінде аудан әкімі Серік Ақтанов мәлім етті, деп хабарлайды Алтайньюс тілшісі.

Айта кетейік, бұл күні аудандағы аталмыш санаттағы 11 отбасы баспана кілтіне ие болды.

– Мемлекет тарапынан көпбалалы отбасыларға әлеуметтік қолдау көрсету ісі қарқын алуда. Оның бір ғана мысалы, алдағы оқу жылында аудандағы аталмыш санаттағы отбасылардың 1 974 баласына тегін мектеп формасы үлестірілмек. Оған қоса аталмыш отбасылардың 9 бен 11 сынып бітірген 70 оқушысын облысымыздағы жоғары оқу орындары мен колледждерге түсіруге күш жұмсаймыз. Баспаналы болған отбасыларға тек қана бақыт тілеймін, – деді аудан әкімі құттықтау сөзінде.

Айта кетейік, бұл күні аудан әкімі қолынан жаңа баспана кілтін алғандардың ішінде аудандағы Айнабұлақ, Дайыр, Жамбыл, Кеңсай, Көгедай, Қарабұлақ, Қаратал, Қуаныш ауылдарынан келген көпбалалы отбасылар болды.