"Рухани жаңғыру" бағдарламасын жүзеге асыру аясында облыста жас тарихшылардың "Менің кіші Отаным" зияткерлік конкурсы өткізіледі. Еліміздегі эпидемиологиялық жағдайға байланысты байқау онлайн форматта өтуде.

Жалпы, байқауға Шығыс Қазақстан облысы мектептерінің 9-10 сыныптарының 92 оқушысы қатысты.

Басты идея - өз елінің тарихына үлкен қызығушылық танытатын дарынды оқушыларды анықтау, өскелең ұрпақтың патриоттық және азаматтық сезімін, сондай-ақ оқушылардың өлкетану және Қазақстан тарихы бойынша білімін дамыту.

"Дарын" қосымша білім беру және дарындылықты дамыту ғылыми-әдістемелік орталығы директорының орынбасары Гүлжан Елемесованың айтуынша, байқау екі кезеңнен тұрады. Бірінші кезең - Қазақстан тарихы бойынша қашықтықтан тестілеу. Екінші кезең 4 номинация бойынша өткізіледі.

- Байқау аясында балалар "Менің кіші отанымның тарихы" тақырыбына видеорепортаж және "Кіші отанымның символы" тақырыбына видео түсіреді. Онлайн форматта "Менің кіші Отанымның болашағы" атты шығармашылық жұмыстар қорғалады, сондай-ақ "Менің туған өлкем" тақырыбына эссе жазылады. Осы жұмыстың арқасында оқушылар өз өлкелері туралы білімдерімен бөлісіп, өз Отанына деген патриоттық көзқарасын көрсетіп, болашақта олардың туған жерлері қалай дамитыны туралы пікірлерімен бөліседі, - деді Гүлжан Елемесова.

Қазылар алқасының мүшесі, NurOtan ШҚОФ ұйымдастыру бөлімінің меңгерушісі Нелли Краснобаева әрбір ұсынылған жұмыс бірегей екенін атап өтті.

- Қазір балалар өз жобаларын ұсынды, олар көптеген қызықты нәрселерді ұсынғанын байқауға болады. Олар өздерінің елді мекендерінің әл-ауқатын қалай жақсартуға болатындығын көрсетуге тырысып, макеттерге көп көңіл бөледі. Бұл жастағы балалар өздерінің туған өлкесінің тағдырына бей-жай қарамайтынын атап өту өте маңызды. Сондықтан болашақта олар өз елінің игілігі үшін бәрін жасауға тырысады. Болашақта әрбір жоба жүзеге асырылады деп үміттенемін, - деді Нелли Краснобаева.

Екі кезеңнің қорытындысы бойынша 4 жеңімпаз іріктеліп, қараша айында өтетін республикалық кезеңде жарысты жалғастырады.