Кеше Семейдің ішкі істер басқармасына біртүрлі арыз түсті, деп хабарлайды Алтайньюс тілшісі.

Жоқ, арыз бүртүрлі емес-ау, оқиғаның желісін айтамыз.

Басқармаға қоңырау шалған 19 жасар қыз автобуста қалтателефонын қолды қылғанын хабарлаған. «Телефонның бағасы 40 мың теңге болатын» деп атап көрсеткен. Алайда із суытпай іске кіріскен тәртіп сақшылары телефонды ешкім ұрламағанын, жас қыздың жалған арыз бергенін анықтаған. Ол тергеу барысында телефонды әлдебір танысына өзі сатып жібергенін мойындапты.

– Қазір осы оқиғаға қатысты, ҚР ҚК 419 бабына сәйкес, қылмыстық іс қозғалды. Жалған ақпар таратқан қыз бала жеті миллион теңге көлемінде айыппұл төлейді немесе үш жыл шартты түрде бас бостандығынан айрылуы мүмкін, – дейді облыстық ішкі істер департаментінің баспасөз хатшысы.